Ikigo cy’Imari iciriritse, Copedu Plc, cyashimiye abakiliya bacyo bakora imirimo y’ubucuruzi itandukanye ku bw’amahitamo meza bagize yo kuyigana, hanaganirwa kuri serivisi z’imari zitangwa muri iki kigo.
Ni igikorwa cyabaye kuri uyu wa Kane tariki ya 29 Ukuboza 2022, aho Umuyobozi Mukuru yashimiye abakiliya ku mikoranire myiza basanzwe bafitanye.
Copedu Plc yongeye kwibutsa abakiliya n’abandi bose bayigana ko hari ubwoko butandukanye bw’inguzanyo bwabafasha kwiteza imbere.
Umuyobozi Mukuru wa Copedu Plc, Muyango Raissa yasabye abakiliya gushishikariza n’abandi bacuruzi kugana Copedu Plc bakabona inguzanyo zibafasha guteza imbere ubucuruzi bwabo.
Mu byaganiriweho harimo ubwoko bw’inguzanyo yitwa ‘Umurabyo Uratinda’ itangwa mu gihe kitarenze amasaha 72 mu gihe uyisaba yujuje ibisabwa ikishyurwa mu mezi atandatu.
Ni inguzanyo ifasha abacuruzi gukura ibicuruzwa muri gasutamo, kwishyura imisoro no gukora amasoko nta nkomyi.
Hasobanuwe kandi inguzanyo yitwa ‘Yige Atuje’ ifasha ababyeyi kwishyura amafaranga y’ishuri n’ibikoresho nkenerwa k’umunyeshuri, inguzanyo yishyurwa mu gihe kitarenze umwaka.
Umukozi ushinzwe serivisi za banki muri Copedu Plc, Mukamusoni Vestine yamaze impungenge abakiliya b’iki Kigo cy’imari iciriritse bibaza niba umukiliya yahabwa indi nguzanyo mu gihe afite indi itararangira.
Yagize ati “Birashoboka. Iyo umukiliya atsindiye nk’irindi soko cyangwa afite umwana yishyurira ishuri, ashobora kubona ubwoko bw’inguzanyo zavuzwe haruguru bitabangamiye ubucuruzi bwe ngo akore mu gishoro.”
Abakiliya bitabiriye bashimiye Copedu Plc ku mikoranire myiza basanzwe bafitanye.
Bishimiye serivisi bagaragarijwe baishimangira icyizere n’iterambere iki kigo cy’imari iciriritse cyabagejejeho nk’uko byashimangiwe na Bwate David ukoranye na Copedu Plc mu gihe cy’imyaka 12, wagaragaje aho yavuye n’aho ageze.
Umuyobozi Mukuru wa Copedu Plc, Muyango Raissa yagaragaje ko mu mwaka utaha, Copedu Plc izakomeza gushyira imbaraga muri serivisi zishingiye ku ikoranabuhanga mu rwego rwokorohereza abakiliya kubona serivisi mu buryo bunoze kandi bwihuse.
Ati “Copedu Plc iri hano kugira ngo ihaze ibyifuzo by’abakiliya byose, haba ku nguzanyo n’izindi serivisi. Ngarutse kuri serivisi z’ikoranabuhanga, uburyo bwa ‘Agent Banking’ buzaba bukora mu 2023 nk’uko biri mu ntego zacu.”
Yasoje yifuriza abakiliya bose n’abafatanyabikorwa umwaka mushya muhire wa 2023, abifuriza kuzawugiramo ishya n’ihirwe.